【十三短打】「你哋唔配着呢件衫！」

「你哋唔配着呢件衫！」，当考虑到阿仙奴录得多个雲加领军以来，甚至球会近1个世纪最差数据，唔难理解「兵」迷之痛，咆哮有理。撰文：球十三

阿仙奴嗰头赢完韦斯咸3:0，转过头又输畀水晶宫0:3，同一比数一来一回，都未行上天堂就急跌落地狱。经此一败，阿仙奴录得雲加上任以来首次作客联赛4连败，队波对上一次咁差，要数到1995年4月由史钊活侯斯顿领军嗰队阿仙奴。如果数到连续4场作客联赛都失3球或以上，更要数到1929年，哗，系88年前慨事！

睇完场波，用士无斗志形容兵工厂冇错，上半场系就系有差唔多7成控球率，但得个「搓」字，要闹系当人家大勇慨韦费特沙夏接二连三喺边陲构成威胁，但成班「兵」好似唔识守咁，输完第1球，第2球又系咁输，完全唔晓吸取教训。禾确特赛后话呢队唔系大家认识慨阿仙奴，要为表现差劲道歉，并非言重。

其实讲到差并唔止呢场，数过去8轮英超，你估除咗包尾大幡新特兰（6场）外，边队输得最多？答啱，阿仙奴是也！输咗5场。

赛后禾确特代表球队向球迷道歉，反而雲加就冇。家阵渠讲又死，唔讲又死，唔重要啰。好彩系，兵工厂下场斗弱旅米杜士堡，或者可以唞唞气，赢返场吊命。