【十三短打】C7入399定400球……重要吗？

到底基斯坦奴朗拿度系咪入咗效力皇家马德里400球？赛后惹起争议，查实讲到尾，系年前1球波呈主观同客观分歧，所以有1球之差。撰文：球十三

基斯坦奴朗拿度（Cristiano Ronaldo）呢场波大发神威之后，皇马官网即刻整张C朗靓图，写住400球。不过有心水清媒体同网民都作出质疑，话其实未够数。讲到尾，原来系1球波作怪，话说2010年皇马2:1赢皇家苏斯达，喺比赛74分钟C朗主射自由球省中队友比比改变方向，当时西班牙足总官方判个波计落比比，皇马就包拗颈，系都计C朗，连比比赛后受访都话：「唔理官方报告点讲，入波归C朗。」

过去唔少球会、球员喺呢啲情况，都有自己演绎，但系天空体育讲得啱，「规例就系规例」，计正，C朗只系入到399球。如果人人都有自己计法，咁唔需要官方数据啦，个个都用自己方法计，只会有更多个自称入过1000球慨罗马里奥。

做完讲古佬，其实呢个所谓里程碑有咩咁重要？你慌呢球唔会好快出现？而C朗亦淡然讲「400球」感想：「我（为皇马）第400球？球队值得恭贺，入波系我目标，但球队由头到尾踢得好。」方圆得体，言下之意一切以球队为先。

讲真，400球本质上冇乜意思，你问C朗亦肯定毫不在乎，渠在乎，都仲系球迷咪再嘘渠。尽力入波，仲要入咁多波仲俾人柴台，怪就怪，你最红。