【十三短打】意大利「瑞典噩梦」再现？

意大利对上一次打唔入世界杯决赛周，系1958年，BBC讲得啱，当年见证呢一幕慨人，家阵已达花甲之年。
撰文：球十三

「我哋冇谂过踢唔入决赛周。」意大利教练云杜拉喺今日世界杯附加赛首回合作客斗瑞典前，似乎胸有成竹，反而十三知道身边唔少意大利趸对渠信心唔多够，你话唔担心势系假。又系慨，荷兰、智利、美国……今届外围赛唔少传统名牌或者决赛周常客都打柴，就算意大利牌面上秤高过瑞典，但边个敢写包单？

十三记得意大利对上一次食惊风散入决赛周，啱啱系20年前，仲记得主场死攻烂攻被英格兰闷和，分组赛屈居次名要踢附加赛，斗俄罗斯就出现保方临危受命把关……眨眼20年啰，保方准备最后一击踢埋世界杯退役，呢个心愿，单靠渠一个唔能够达成，要靠队友帮拖至成事。

睇今次外围赛，意大利中前场真系欠领军人物，你话踢整体咩，又唔见好似干地旧年领军踢欧国杯咁有效率，外围赛分组赛被狂牛KO，完全系冇得踢嗰只。当获重召慨施蒙尼沙萨操练受伤，意国传媒已大做文章，死未？唔系踩渠，换转系意大利高峰期，沙萨呢类人物，后备都未必有份踢。

瑞典冇2004年欧国杯破意军大门慨伊巴谦莫域，锋力系弱咗，意大利唔怕再有人出「怪脚」，但呢支北欧兵团始终烂打，今年赢过葡萄牙同法国，一下唔觉意主场入你一粒赢波，要蓝胡次回合返主场抢攻，就真系危机四伏。

1958年冇意大利慨世界杯正正喺瑞典上演，成为意大利趸慨遗憾、集体噩梦，即管睇队波争唔争气，咪要球迷再发瑞典噩梦至好。