【十三短打】意大利趸今晚点瞓得着？

到底意大利可以绝处逢生，抑或经历60年嚟首次缘尽世界杯慨痛？「保方保方，保住后方！」呢句球迷讲咗十几廿年慨话，又会唔会从此成为国际舞台慨绝唱？太多问题，太多情绪，意大利趸，今夜点瞓得着？
撰文：球十三

咪话新一代，「60后」打后慨球迷都未见证过传统强国意大利无份踢世界杯，有个老友话首回合前听到云杜拉唔信踢唔到决赛周，个心已凉半截，蓝军意大利时间今夜摆阵再斗瑞典图收复0:1失地，赛前又听见老人家讲相同说话，真系担心多两钱重。老实，若然意大利出局，渠固然冇得捞，但边有人关心渠去留，关心系大家熟悉慨球星。

以保方为首慨防线，食老本食咗好多年，若然决赛周不入，保方固然退落嚟，怕且阵中个别老将，好似另外两个2006年世界杯冠军成员巴沙利、迪罗斯怕且都「嗰头近」。当然大家最唔舍得会系钢门保方，一代门神缘尽决赛周，对球迷都系损失。

咪住！仲有90分钟，边个敢写死队波。不过眼见北爱尔兰同希腊两场次回合都闷和0:0，未能收复失地，今晚意军面对死守，会唔会又整场0:0？

圣西路系蓝军福地，据讲队波喺呢个米兰主场踢慨国际赛未输过，不过今夜唔输都唔够，一定要赢，而且仲要咪失波，失1球就至少攻入3球，以意军目前锋力，3球太难。

所以讲到尾，波固然要入；后防实在不容有失，晋级先缺条件，仲系要靠保方保住后方先。