【十三短打】若果曼城过晒5关……

曼城已经刷新联赛15连胜纪录，而十三唔知近年有冇球队首循环能够环扫其他Big 6劲敌，过「5」关斩6将。若果可以，下半季仲驶踢慨？
撰文：球十三

曼城今季斗利物浦、车路士、阿仙奴同埋曼联悉数赢晒，其中主场大炒利记同作客赢曼联最精彩，唔讲其他净系睇数据系KO完胜嗰只。周末挟长胜迎击来袭慨热刺，系蓝月下月次循环作客利记前仅有硬仗，即系过埋热刺呢关，好可能到1月继续保持双位数领先优势，咁就真系争霸路路通。呢一刻，蓝月简直系鬼见愁，试问边有球队呢刻愿意碰上？

如果有，嗰队就系热刺。

为Big 6守尾门慨热刺3连胜近况回勇，你有阿古路、加比尔捷西斯，我有今季7场作客入7球慨哈利卡尼、孙兴民；而且热刺对赛往绩好坚，对上4次喺英超斗曼城都不败，战绩为3胜1和，算系近年少数克死曼城慨球队。

讲番普捷天奴同哥迪奥拿亦早有渊源，前者首场领军比赛就系遇上哥迪奥拿，当时系率爱斯宾奴喺西杯闷和巴塞隆拿0:0。1个月之后，渠更率爱军喺西甲作客赢巴塞2:1。系人都知巴塞一向都系同市一哥，成世虾爱斯宾奴，所以当时普帅扬威鲁营，实在系响朵之作。

十三话明系中立，但站喺观战立场，如果曼城今退「热」赢埋继续一放绝尘，争标大局可观性，又真系弱晒。

曼城本季VS Big 6战绩
主VS热刺？
客胜曼联2:1
主胜阿仙奴3:1
客胜车路士1:0
主胜利物浦5:0